ఓమ్
శ్రీకృష్ణ పరబ్రహ్మణే నమః
శ్రీకృష్ణ సంకీర్తనములు
గ్రంథకర్త :-
కీ.శే.కోడీహళ్ళి చన్నరాయప్ప
71.గంగ తుంగ యమున - కావేరి నదులలొ
మంగళముగ చేయు - మజ్జనమున కంటె
రంగైన భక్తిని - రామ భజనము చేయు
సంగతి ఫలమునకు - సాటిరాదు కృష్ణా
llకృష్ణll
72.అణురేణు తృణ కాష్ట - మన్నిటి యందును
అణగి యుందువు నీవు - అఖిలలోకముల
గణుతింప భక్తులకు - కల్పవృక్షము నీవు
ప్రణుతి సేయుదు నిన్ను - పద్మనాభయ్య
llకృష్ణll
73.అంగన పనుపున - అటుకులను ధోవతి
కొంగున ముడిచిన - కూరిమి భక్తుని
సంగతి కనుగొని - సంతసమందితివి
రంగుగ భాగ్యము - రయమున నిచ్చితివి
llకృష్ణll
74.కుక్షిని భువనములు - కుదురుగ కూర్మిని
నిక్షేపము జేసి - నీరధి నడుమను
రక్షక వటపత్ర - రాజిని వెలుగుచు
దక్షత పవళించు - ధన్యశ్రీకృష్ణా
llకృష్ణll
75.ఆదణ్డకాటవిని - కోదండమును దాల్చి
కోదణ్డ రాముడౌ - కోమలంబగు మూర్తి
నాదణ్డ నిలిచి న - న్నయముగ రక్షింపు
వేదణ్డమును బ్రోచు - విశ్వమోహన కృష్ణా
llకృష్ణll
76.తనువు మనువు హితులు - తల్లిదండ్రులు భార్య
తనయులు సోదరులు - తథ్యములు గారయ్య
వినయమున నమ్రత - వినుతింతు ప్రణుతింతు
అనవరతము నిన్ను - ఆది దేవుడ! కృష్ణ
llకృష్ణll
77.విశ్వోత్పత్తికి - విరించివయితివి
విశ్వరక్షణ జేయ - విష్ణువైతివి దేవ!
విశ్వము జెరుపను - విశ్వనాథుడవు
విశ్వాత్మక నిన్ను - వినుతింతు కృష్ణా
llకృష్ణll
78.చూపు నీరూపము - సుందర దేవా!
పాపములెల్లను - బాపుము స్వామీ!
శ్రీపతి నిను భక్తి - స్థిరముగ నమ్మితి
కాపాడు కరుణించి - కంజలోచన కృష్ణ
llకృష్ణll
79.పాపములెల్లను - హరియించి జ్ఞాన
దీపము నాలోన - తేజరింపుము స్వామి
తాపమునార్పుము - ధన్యునిగ జేయుము
ప్రాపున జేరితి - పాహిమాం కృష్ణయ్య
llకృష్ణll
80.అగణిత వైభవ - ఆదిపరబ్రహ్మ
నగధర! కేశవ! - నారాయణ! కృష్ణ!
భగవాన్ శ్రీహరి - భక్తజనవత్సల
జగదీశ శౌరీ! - శరణు శ్రీకృష్ణయ్య
llకృష్ణll
81.నీనామ భజనమున - నిరయము మాయమౌ
నీనామ స్మరణమున - నిఖిల సౌఖ్యములు
నీనామామృతమును - నెల్లపుడు జుఱ్ఱుచు
నీనామ భజనమున - నిరతముందును కృష్ణా
llకృష్ణll
82.అతిపాప కర్ములై - అవని చరియించిన
మతిహీనులై స్త్రీల - మమతబడియుండిన
సతతము నీనామ - స్మరణమున దవిలిన
అతుల సౌఖ్యములెల్ల - అందరె కృష్ణయ్య
llకృష్ణll
83.అపరాధములు గాక - అఘము పెక్కులు జేసి
చపలుడై కపటుడై - చరియించి నానయ్య
శ్వపచుడౌ దౌర్భాగ్యు - శాంతమౌన క్షమియించి
కృపయుంచి నన్ను బ్రోవు - కృష్ణ! ముకున్దా
llకృష్ణll
84.పాలు వెన్న మ్రుచ్చి - పారిపోవగ నీవు
ఱోల నిను గట్టినది - రోషమున నీ తల్లి
లీలా వినోదమున - ఱోలను యీడ్చితివి
బాలుడవు చూచితే - బ్రహ్మ గన్నయ కృష్ణా
llకృష్ణll
85.పరమ దయానిధె - పతిత పావన రామ
హరి హరి! గోవిన్ద - ఆనంద హరియనుచు
స్థిరమతిని భజనమును - చేయుదులెల్లపుడును
కరుణగాపాడుము - కంజ లోచన కృష్ణా
llకృష్ణll
86.వనజాక్ష! వనమాలి! - భక్త వత్సల కృ
ష్ణ
!
ఘనత చెందితివయ్య - కలుష సంహార దేవ!
సనకాది మునులైన - సన్నుతింపగ లేరు
నను బోటి వాడెంత - నిను వర్ణింపగ కృష్ణా
llకృష్ణll
87.రఘు వంశ నాథా! - రామా నీజపము
లఘుమతి కలవియె - లక్ష్మీశ! కృష్ణా!
అఘములను బాపుము - ఆత్మ పరాయణ!
రఘురామ రామ! - రామ శ్రీకృష్ణా!
llకృష్ణll
88.కరణ త్రయంబులను - కలిమి పేదలనైన
నరుడే కర్మమైన - నయమొప్ప జేసినను
హరికర్పణంబనుచు - ఆత్మ పలుకుట యెల్ల
పరమ సుజ్ఞానము - పరికింప భువిలోన
llకృష్ణll
89.నరపశువ మూఢుఢను - నయము కొంచెము లేదు
దురితములు చేసి నే - దోషుడై బరగితిని
అరయ నిను గుర్తింప - అలవి కాదు నాకు
పరికింప దాపును - ప్రాపు నీవే కృష్ణా
llకృష్ణll
90.కంటికి ఱెప్ప యే - కరణి రక్షించునో
బంటును నన్నట్లు - బాయకను బ్రోవుము
జంట నీవుండిన - జమునికైనను వెఱవ
కంటక పాపములు - కడచెదను కృష్ణా!
llకృష్ణll
(సశేషము)
కామెంట్‌లు లేవు:
కామెంట్‌ను పోస్ట్ చేయండి