శ్రీకృష్ణ సంకీర్తనములు - నాలుగవ భాగము

ఓమ్

శ్రీకృష్ణ పరబ్రహ్మణే నమః

శ్రీకృష్ణ సంకీర్తనములు 

గ్రంథకర్త :-

కీ.శే.కోడీహళ్ళి చన్నరాయప్ప

61.దేవేంద్రుడుగ్రుడై - తీవ్రముగ వర్షింప

   గోవర్ధనాద్రిని - గొడుగుమాదిరినెత్తి

   గోవులను గోపకుల - కోరి రక్షించితివి

   దేవేంద్రు గర్వమును - దేవ! ఖండించితివి              llకృష్ణll

      

62.ఎటువలె ప్రహ్లాదు - నేలితివి కరుణ

   ఎటువలె కరిమొఱను - ఎఱిగి బ్రోచితివి

   కుటిలుడ చపలుడ - క్రూరుడగు నన్ను

   అటువలె రక్షింపు - అచ్యుత! కృష్ణా!!                  llకృష్ణll

           

63.గారడి మాయగ - గన్పడి  సర్పము

   వారక నాశము - వనరుహ లోచన!

   సారహీన సం - సారమసారము

   ఘోరవిపత్తులొ - గూల్పకుము కృష్ణా!                llకృష్ణll

            

64.దుర్జనులైనట్టి - దుష్టరాజులను

   నిర్జింప మనసిడి - నిఖిలాధారా!

   దుర్జనుల రణమున - దునుమాడుటకై

   అర్జునకు సారథి - వైతివి కృష్ణయ్య                    llకృష్ణll

          

65.తారల లెక్కలను - త్వరగ జెప్పగవచ్చు

   భూరేణు గణితము - బోల్చి పల్కగ వచ్చు

   నారాయణ నిన్ను - నయముగ వర్ణింప

   అరయ తరమౌనె - హర బ్రహ్మాదులకైన               llకృష్ణll

          

66.గ్రహభయదోషములు - గ్రక్కున మాయమౌ

   బహు పీడలు కూడ - బాసిపోవు వేగ

   ఇహపరసౌఖ్యములు - ఇమ్ముగ గలుగుటకు

   బహుయోచనలేల - భక్తిని భజియింప                llకృష్ణll

          

67.అండజ వాహన! - బ్రహ్మాండములనెల్ల

   చెండులుగ నెత్తుచు - చెలగియాడు నీకు

   కొండల నెత్తుట - కొండిక పని గాక

   కొండ నీకు దొడ్డ - కొండ గాదు కృష్ణ                 llకృష్ణll

               

68.కందర్ప సుందర! - కరుణ సింధు మూర్తి!

   మందరధర కృష్ణ! - మధుకైటభాంతక!

   సుందర విగ్రహ! - సుర ముని గుణ వంద్య!

   వందనములు భక్త - వత్సల! శ్రీకృష్ణ !                llకృష్ణll

                

69.పదియారు వేలుగ - పద్మాక్షులు నీకు

   ముదితలై యుండగ - ముద్దుగ కులుకుచు

   విదితముగ వారలకు - వేడుకల జూపుచు

   వదలక రమియించి - వసుధ బరగితివయ్య           llకృష్ణll

               

70.భవబంధ మోచన - భక్త జన పోషణ

   పవనజ నుత రామ - భద్రాద్రి రామా!

   అవని నాయకుడ - ఆశ్రిత పోషకుడ

   భవహర! మురహర - భక్త కల్పవృక్ష!                 llకృష్ణll

                

(సశేషము)