...

...

11, నవంబర్ 2010, గురువారం

దీనిభావమేమి?

శ్రీ కంది శంకరయ్యగారు తమ శంకరాభరణం బ్లాగులో ఇస్తున్న ప్రహేళికలు చూసి పొందిన ప్రేరణతో ఈ ప్రహేళికను తయారు చేశాను. ఈ పద్యంలో నేను చెప్పదలచినది ఏమిటోవివరించండి.

సీ. లీడరు తాతకు లీలగ తనయుడై
           నట్టియతని బావ నలరు బోడి
    సంగడించిన వాని సంప్రీతురాలి పె
           నిమిటికి తమ్ముడు నిజముగాను
    ఆతని తండ్రికి అత్త కొడుకు టెక్కు
           తెఱగునకధిపతి తఱచి చూడ
    మూడవయవతారముచె ప్రభావితుడైన
           శూరుని కనుగొన శోకలేమి!

తే.గీ. అతడు వితతమొనర్చిన ఆశయముల
       ననుసరించిన దివ్యగుణ యశకీర్తి
       చేసిన సముద్యమమునకు చేరుగడ
       సర్వసాక్షి యొసగు గాక సంపదలను!!

ఈ ప్రహేళికలోని ప్రత్యేకత ఏమిటంటే దీనిలో మూడు అంశాలున్నాయి. ఎరుపు రంగులో ఉన్నది లౌకిక అంశము అంటే ప్రస్తుత రాజకీయాలు, సినిమాలు, గాలి కబుర్లు మొదలైన వాటి ఆధారంగా చేసుకుని తయారు చేసినది అన్నమాట. ఇక ఆకుపచ్చ రంగులో ఉన్న భాగము పౌరాణిక సంబంధమైనది. అలాగే నీలం రంగులో ఉన్నది చారిత్రక అంశాలతో కూడినది. ఒక దానిలోనుండి మరో అంశానికి పోయినపుడు ఆ భాగంలోని పాత్రతో అన్వయించుకోవాలి. ఉదాహరణకు లౌకిక భాగములో సినీ నటుడు కృష్ణ చివరగా వచ్చాడనుకోండి అది పౌరాణిక భాగంలో వచ్చేసరికి శ్రీకృష్ణునిగా అన్వయించుకోవాలి. అర్థమయింది కదా ఇక ప్రయత్నించండి.

13 కామెంట్‌లు:

Sandeep P చెప్పారు...

మీ ప్రహేళిక శానా కష్టంగా ఉంది. సమాధానం నాకు చిక్కలేదు :( చదువర్ల అభిప్రాయం కోసం చూస్తాను.

మంద పీతాంబర్ చెప్పారు...

క్లిష్టమైన ప్రహేళికలను సైతం అలవోకగా పరిష్కరించగల దిట్టలు మీరే. మీరు తయారు చేసిన ప్రహేళికను,
అందునా లౌకిక,పౌరాణిక చారిత్రిక అంశములతో గూడిన ప్రహేళిక ప్రశ్న పత్రాన్ని సెట్ చేస్తే మళ్లీ మీలాంటి వారికి
మాత్రమే పరిష్కరణ సాధ్య పడుతుంది. సరియైన జవాబు కొరకు వేచి చూడడము తప్ప ఆలోచించ వలిసినదేమిలేదు.

కంది శంకరయ్య చెప్పారు...

అయ్యా, కోడీహళ్ళి మురళీ మోహన్ గారూ,
మీ "క్రాస్ వర్డ్ సాల్వుము" లాగే ఈ ప్రహేళిక కూడా క్లిష్టంగా ఉంది. నాకు 1980 తర్వాతి సినీ పరిజ్ఞానం అంతంత మాత్రమే. ఎంత ఆలోచించినా చిక్కుముడి వీడడం లేదు. నేను అశక్తుణ్ణి.

భమిడిపాటి సూర్యలక్ష్మి చెప్పారు...

వివరణ ఇవ్వలేను కాని నేను అనుకుంటుంన్నది మాత్రం
రామారావు(జూనియర్) , రాముడు, (శ్రీరాముడు), రామరాజు( అల్లూరి సీతా రామరాజు)
లేక
నారాయణ( నారా చంద్రబాబు గారి సోదరుడు తప్పుఅయితేక్షమించవలసినది) నారాయణుడు(విష్ణుమూర్తి) , జయప్రకాష్ నారాయణ.

నా ఆలోచన సక్రమంగా వుందా లేదా, త్వరగా సమాధానం ఇవ్వండి.

అజ్ఞాత చెప్పారు...

లీడరు = రానా
రానా తాత = రామానాయుడు
రామానాయుడి తనయుడు = వెంకటేష్
వెంకటేష్ బావ = నాగార్జున?
నాగార్జున అలరుబోడి = అమల? కరెక్టేనా?

ఊకదంపుడు చెప్పారు...

అజ్ఞాత గారు అవునండీ

జ్యోతి చెప్పారు...

కాని అమల తర్వాత ఇంకా ఉందికదా ...

చివరికి రజనీకాంత్ అనుకుంటున్నా.. నిజమేనా??

డా.ఆచార్య ఫణీంద్ర చెప్పారు...

ఒద్దికగా యోచించితి -
గుద్దులు గుద్దితిని నుదుట - గోకితి తలపై -
బద్దలు గొట్టితి బుర్రను -
మొద్దు, నది యెరుంగనైతి - మురళీమోహన్!
- డా.ఆచార్య ఫణీంద్ర

కామేశ్వరరావు చెప్పారు...

చివరి భాగం యిదనుకుంటా: శూరుడు - అశోకుడు (శోక లేమి). అతడు వితతమొనర్చిన ఆశయములు అహింస, సత్యము. అతని అనుసరించిన దివ్యగుణ కీర్తి కలవాడు గాంధి.

అయితే అశోకుడు ప్రభావితుడైన అవతారం బుద్ధుడు తొమ్మిదవ అవతారం కాని మూడవ అవతారం కాదు. దశావతారాల్లో మూడో అవతారం వరాహం. దానితో ప్రభావితుడైన చారిత్రక వ్యక్తి ఎవరూ ఉన్నట్టు లేదు!

"టెక్కు తెఱగున కధిపతి", "సంగడించిన వాని సంప్రీతురాలు" - వీటి తాత్పర్యమే బోధపడకుండా ఉంది!

mmkodihalli చెప్పారు...

సందీప్ గారూ! కష్టంగానే ఉంటుంది. కొంచెం ఇష్టంగా ప్రయత్నించండి మరి.

పీతాంబర్ గారూ! ఇలా పొగిడేసి జవాబు చెప్పకుండా చేతులెత్తేయడం బాగోలేదు :-))

శంకరయ్యగారూ! పైన అజ్ఞాత ఇచ్చిన సమాధానానికి కొనసాగింపుకు 1980కు ముందున్న సినిమా పరిజ్ఞానం సరిపోతుంది. ఇక పౌరాణిక చారిత్రక విషయాల్లో మీకు అడ్డేముంటుంది?

సూర్యలక్ష్మి గారూ! మీ ఆలోచన తప్పండి.

అజ్ఞాతగారూ! ఇంతవరకూ కరెక్టే. తరువాతిది ఆలోచించండి.

ఊకదంపుడు గారూ! లౌకిక భాగాన్ని అలవోకగా దాటగలిగారు. తరువాత ఏమిటన్నది ప్రయత్నించండి.

జ్యోతిగారూ! రజనీకాంత్ కాదండి.

డా.ఆచార్యఫణీంద్ర గారూ! హ...హ... హ...

కామేశ్వరరావు గారూ! మీ ఊహ చాలావరకు నిజమేనండి. మూడవ అవతారం అంటే మొదటి నుండి కాదండి. టెక్కు తెఱగున కధిపతి తరువాత మూడవ అవతారం లెక్క వేసుకోండి.

mmkodihalli చెప్పారు...

చిన్న సవరణ. పైన కామేశ్వరరావుగారికి ఇచ్చిన వివరణలో టెక్కు తెఱగున కధిపతి తరువాత అని కాక టెక్కు తెఱగున కధిపతితో కలిపి అని చదువుకోండి.

కామేశ్వరరావు చెప్పారు...

నేనూ అదే అనూన్నానండి. ఆ లెక్కన రాముడవ్వాలి. కాని రాముడు "టెక్కు తెఱగున కధిపతి" ఎలా అయ్యాడో, అతను ఎవరికి అత్త కొడుకో అంతుపట్టటం లేదు. కృష్ణుడైతే అర్జునుడికి అత్త కొడుకవుతాడు. కాని కృష్ణుడికి మూడో అవతారం కాదు బుద్ధుడు. బలరాముడు కూడా అవ్వడానికి లేదు. ఎందుకంటే బలరాముడూ కృష్ణుడూ బుద్ధుడూ ముగ్గురూ ఒక లిస్టులోకి రాలేరు.

కంది శంకరయ్య చెప్పారు...

చర్చ ఆసక్తికరంగా ఉంది. కొనసా ............. గించండి. మురళీమోహన్ గారు ఇంకా ఎంతకాలం సాగదీసి సమాధానం చెప్తారో? వేచి చూద్దాం.